I
Nakakatuwa
Ang mga bulaklak na dilaw, pula at luntian
Laluna kung itatabi sa kandilang bughaw, puti at kayumanggi
Sabay hahalikan ng araw tag-sibol na lulubog-lilitaw
Sa likod ng abuhang ulap na tabing
Ang mga punong dahan-dahang nabubuhay
At bukiring sinabuyan ng bahagharing hamog
Kariktan ng Europa
Na pupuno ng isang bayong na alaala
At babaunin sa mga tahimik na hapon
Habang ang tren ay payapang umuusad
Patungo sa susunod na hantungan.

-Utrecht, ika-30 ng Marso

II
Mala-museleong
Estasyon ng tren alas-diyes ng gabi sa Leuven
Ang pansamantalang hantungan
At sa tawiran ng lansang bato
Naghihintay ang paring naka-itim
May pasalubong na ngiting pagbati
Hardin ng mumunting bulaklak
Na kipkip pa mula sa bayang nakakapaso
Ang sikat ng araw
Papawi sa anino ng paglalakbay
At kaluskos ng agam-agam
Na wari'y walang katapusan.

-Leuven, ika-4 ng Abril

© Al Santos

| poets' bios |