busog na busog
ang mga bagahe sa sisidlang
plastic na umaapaw sa tsokolate
at cellphone at sapatos at gamit
sa bahay na babalikan
matapos ang sandaling paglalakbay
parang ihip ng hangin
dumaan sa buhay ng walong
Pinoy na tumawid
sa bahagharing karanasan
sa lupaing walang lamok
at siyento-beinte ang isang kaha
ng sigarilyong umuusok ng larawan
ni Lorena at Ryusei at Enlil at Ellahi

uuwing baon
ang kumot ng gunita ng mga inang nagluto
ng adobo at sinigang at tinolag manok
ni Ofel, Juliet, Rose, Malu, Precy
Jessie, Doray, Myrla, Hermie at Rosa
sinangkapan ng mga kuwentong pampainit
ng dibdib na giniginaw
mga Nanay sa Europa at saan mang bayang
mapadpad ay maghahain ng almusal
na tinapay, hamon, keso, kape
habang nangangarap na sana'y
longganisa't sinangag ang nasa hapag
gaya ng mga agahang inihahain ni Nanay
bago mamalengke ng tanghalian at hapunan
para sa pag-uwi ng sintang anak

-Leuven, ika-6 ng Abril

© Al Santos

| poets' bios |