Ang Halimaw
Ni Mila D. Aguilar

Tingnan mo nga naman ang lengguahe,
kung anu-anong nabubulatlat.
Sa kanila'y "beast,"
sa atin ay halimaw.
Tawag din nila sa kanilang mga hayop, beast
na sa atin ay
di halimaw.
Halimaw baga yang may silbi sa sangkatauhan
at nilikha ng maylikha?

Kakatwa, pero ang maaaring maging katumbas
ng halimaw sa kanila
ay chimera.
Di kinakatakutan, bagkus hinahangad.
Pipe dream na tinatawag.
Pangakong may bantang ipatutupad.
Pero bantay ka, hayop ang itsura.

Samantalang ang halimaw sa atin
ay di kanais-nais.
Wala sa porma ng anumang
nilikha ng Dios.
Isipin mo na lang Ang Halimaw:
pitong ulo, sampung sungay.
May pasan-pasang siudad
na nagpaputa sa pitong haring
siya ring mga ulo
at kinasusuklaman ng sampung haring
siya ring mga sungay.
Saan ka nakakita ng kababalaghang tulad nito?
At gugustuhin mo bang maisakatuparan itong halimaw
kung di ka isa sa mga haring
nakikinabang?

© Mila D. Aguilar