BA Flight No. 032 (1997)
to Kai Tak Airport, Hongkong
Ni Papa Osmubal

Ngiting Phoebe Cates ang mga stewardess
habang ina-announce naman nang may western pride
sa mga loud speakers na maghahapunan kami
ng masasarap na kung anu-ano
na all the way from Europe pa raw
gayong ang sikmura ko ay nakabara
sa aking lalamunan at ang aking mga talampakan
ay kinikiliti’t manaka-nakang ine-electrocute
ng malamig na daliri ni Ginoong Kamatayan
at ang aking laway at tutuli ay buhol-buhol

Di ko na rin makuhang humingi
ng kahit beer man lamang samantalang kagabi
para kaming mga uhaw na rockers à la Sex Pistols
kung tumungga ng Black Label at Remy Martin
ni Pareng Tonyo (Anton o kaya Ton-Ton daw
kapag kulay makopa na) habang ina-attack
naman ni Shaq at ng kanyang mga Laker Beauties
ang mundo naming kulay Mtv

© Papa Osmubal

| about the author |