Ngayon ko lang nalaman
na ang Hari at hanip pala
ay magkamag-anak
at magsinghilig.

Ang Hari ay nag-utos sa heneral
na nagkalatas sa kapitan
na tumawag sa sarhento
na bumulyaw sa sundalo
na nagparating sa malaking pinuno
na sumenyas sa maliit na pinuno
na tumapik sa sekretaryo
na pumaswit sa empleyado
na sumigaw sa kasamang empleyado
na nag-utos sa katulong
na sumipa sa kabayo
na tumadyak sa kalabaw
na umangal sa aso
na kumagat sa pusa
na sumakmal sa daga
na lumigkis sa ipis
na kumain sa langgam
na lumamon sa kuto.

Tumalima naman ang hanip.

(1978)

© Loreta M. Medina