Noong tumuntong ako ng
          Kuwarenta
Naisip ko silang
Hindi umabot dito

Ferdie Arceo
          Bente uno
Ellecer Cortez
          Bente dos
Emilio Jacinto
          Bente tres

Kwarenta raw
Ang tunay na simula
Ng Buhay
Ang unang hakbang
Sa paglalakbay

Pero silang naiwan
Silang di nakapagsimula
Ng Biyahe

Gregorio del Pilar
          Bente kuwatro
Jessica Sales
          Bente singko
Jennifer Cariño
          Bente sais

Malayo
Ang Nalakbay
Malago
Ang Pinunlang Simula

Lean Alejandro
          Bente syete
Lorena Barros,
          Bente otso
Bobby de la Paz
          Bente nuwebe

Kahit di nakapagsimula
Ang biyahe
Naudlot
Ang paglalakbay

Noong tumuntong ako ng
          Kuwarenta
Ginunita ko silang
Hindi nakarating dito

Voltaire Garcia
          Trenta'y uno
Gabriela Silang
          Trenta'y dos
Andres Bonifacio
          Trenta'y tres

Bagamat ang kanilang
Mga Simula
Pinagtalunan
Ang katuturan
Wasto ba't tuwid?

Ang landas
Puno ng lubak
Matirik ang mga liko
Walang linaw sa layo

Edgar Jopson,
          Trenta'y kwartro
Jose Rizal
          Trenta'y singko

Simula pa ring
Ihinain
Sa ating tumitikim pa
Ng buhay

Macario Sakay
          Trenta'y siyete

Isinapin sa daan
Para sa 'ting patuloy na
Nakapaglakbay

Alex Orcullo
          Trenta'y otso

Kinilala ko sila
Pinarangalan
Silang naiwan
Sa daan
Silang naglatag ng kasaysayan

Apolinario Mabini
          Trenta'y nuwebe

     Naisip ko sila
     Noong tumuntong ako ng
Kuwarenta

(alay sa kanilang hindi ko na naisali:
efren turla, josemari enriquez, ditto sarmiento,
eman lacaba, nanding torralba
at marami pang iba.)

Hulyo 2004

© Benjamin Pimentel