home
from the editor's laptop
welcome readerpoemsessaysshort storiesportrait of an artistbookslinksarchivesindex to issuesOOV readersabout us / submitcurrent issue

 

Paano bang mamuhay ng malaya?
ni Rolly delos Santos

delos Santos painting

Tunay ka bang malaya
pagkat ika’y wala sa hawla?
Hindi naninilbihan sa hindi kadugong
iba ang kulay ng balat at anyo?
Malaya ka ba dahil nasisilayan mo ang araw,
napagmamasdan ang buwan
at nararamdaman ang init ng haplos
ng hanging amihan sa gitna ng kadiliman?

Baka naman ika’y parang sampung daliri
na oo nga’t malayang kumilos nang walang paglilimi
pagmasdan mo’t ang kilos naman nito’y
kumporme pa rin sa natural na daloy
pagkat ito’y nakadikit sa iyong palad
kahit gaano pa man ito kalapad.
Oo nga’t maaari kang pumunta kahit saan
ngunit paano itong gagawin kung bulsa mo’y
butas hanggang sa kailailaliman?

Maituturing bang malaya ang isang kaluluwang
ipinapanganak pa lamang ay baon na sa utang?
Utang na ginastos ng walang kapararakan
ng hindi naman dayuhan bagkus ay isang kalahi
na buong hayok na niyurakan yaring kalooban.
Siya na halos isuka ang pagkasarap-sarap na pagkaing
nakahain sa mamahaling pinggan
sapagkat siya’y bundat na sa kabusugan
habang ikaw nama’y kumukulo
ang maasim na sikmurang
parating walang laman.

Ilang beses na bang pinakawalan
itong ibong pipit mula sa kanyang piitan?
Di ba nga’t tuwing may pagtitipong ganyak
Itong mga tibak na hamak
mikoropono’t gitara ‘y pihadong tangan
paliliparin ito at pagbuka ng pakpak ay hahayaan
Subalit , kaibigan, ito’y sa awit lamang
kaya’t kawawang ibo’y umiiyak pa rin sa parang.

Ano ang ganda ng bulaklak na busilak
kung ang pang-amoy mo nama’y manhid
pagkat binara ang ilong mong makitid
ng sangsang ng amoy na basurang hatid?
Aanhin mo ang ganda ng sikat ng umaga
kung bulag ka naman sa sinapit ng inang bayan?
Ano ang silbi ng tamis ng tunog na dulot ng lira
kung bingi ka naman sa panaghoy ng batang ulila?

Malaya ka nga ba kaibigan
pagkat sa hawla ika’y hindi naninirahan?
Pakaisipin mong mabuti
ang ibong pipit na nakapiit ay pihadong kakain
anumang sandali, minsan nga’y pinipilit
samantalang ika’y wala man lang kahit ano
umaasa lamang kung anong sasapit
na tila baga isang aso
nakatali at nag aalumpihit.

© Rolly delos Santos

 

back to toptop | about the author



powered by
FreeFind
Lucifer, Mistranslated
Eileen R. Tabios
OOV 2010 RESIDENT POET

Paano bang mamuhay ng malaya?
ni Rolly delos Santos

Scratching Jesus
by Rachelle Cruz

I
by Sean Labrador y Manzano

Learning How to Breathe
Balaena mysticetus

Joel Vega

For Paul
Aileen Ibardaloza
  poems | essays | short stories | portrait of an artist
from the editor's laptop | welcome reader | frontispiece
books | links | archives | index to issues | readers
about us | current issue